List- og heimildaljósmyndun: Sjónræn samfélagsrýni

Á námskeiðinu kynnast nemendur aðferðum og hugmyndum við að skapa og skilja ljósmyndir. Lögð er áhersla á list-, heimilda- og samtímaljósmyndun sem skapandi aðferð til samfélagsrýni og gagnrýninnar ígrundunar.  Áfanginn felur í sér, rannsóknir, gagnrýna hugsun sem byggir á tilraunum og fjölbreyttum aðferðum sem hafa áhrif á útkomu ljósmynda og leiðir til að ígrunda þær.

Fjallað verður um hvernig samtímaljósmyndun getur varpað ljósi á félagsleg, menningarleg og pólitísk málefni og hvernig myndræn frásögn getur skapað rými fyrir nýjar raddir og sjónarhorn í samtímanum.  Nemendur kanna hvernig tilraunir, aðferðir og ákvarðanir hafa áhrif á útkomu ljósmynda og leiðir til að íhuga þær. Á námskeiðinu verða skoðuð verk listamanna og ljósmyndara sem vinna með samtímaljósmyndun, samfélagsleg inngrip, staðbundnar frásagnir og þátttökuaðferðir. Einnig verður fjallað um tengingu ljósmyndunar við rannsóknarvinnu, samtímalist og breytt hlutverk ljósmyndarinnar í nútímasamfélagi.

Markmið námskeiðsins er að nemendur þrói með sér gagnrýna og meðvitaða sýn á samtímaljósmyndun sem tjáningarform og skapandi þátt í samfélagsumræðu.

Í lok námskeiðs ætti nemandi að geta:

• skilgreint helstu hugmyndir, aðferðir og sögulegt samhengi list- og heimildarljósmyndunar
  • greint ljósmyndir út frá samfélagslegu, siðferðilegu og fagurfræðilegu sjónarhorni
  • beitt ólíkum aðferðum ljósmyndunar til eigin sköpunar og tjáningar
  • þróað eigin ljósmyndaverk sem endurspegla gagnrýna og ígrundandi afstöðu til samtímans
  • tekið virkan þátt í umræðum og gagnrýni á eigin verkum og annarra bæði munnlega og skriflega