Automatic translation by Google Translate.We cannot guarantee that it is accurate.
Skoða vefinn á ÍslenskuHeillast þú af töfrum kvikmyndalistarinnar ?
Viltu kynnast sögu og menningu Rússlands í gegnum einstakt listaverk ?
Viltu vita hvort að þínar innstu þrár geti ræst ?
Þá er Velkomin á bannsvæðið með Gunnari Þorra Péturssyni námskeið fyrir þig.
Stalker (1979) eftir Andrej Tarkovskí er eitt helsta meistaraverk kvikmyndasögunnar. Myndin gerist á hinu dularfulla „svæði“ þar sem þínar innstu þrár geta ræst. En þekkjum við okkar innstu þrár og viljum við þegar öllu er á botninn hvolft að þær verði að veruleika?
Hið dularfulla svæði (rússn. zona) í senn staðleysa og blákaldur veruleiki, uppspretta ódauðlegra listaverka en jafnframt lykillinn að myrkustu kviku rússneskrar þjóðarsálar: heimsstyrjöldinni síðari, gúlaginu, Tsjernobyl-slysinu, innrásinni í Úkraínu.
Á námskeiðinu horfum við á Stalker og köfum ofan í tilfinningaleg áhrif og frumspekilegar spurningar sem myndin vekur.
Fjörutíu ár eru liðin síðan Tarkovskí heimsótti Ísland og sat fyrir svörum á kvikmyndahátíð þar sem allar myndir hans voru í fyrsta skipti sýndar á einum stað. Rússnesk stjórnvöld reyndu að koma í veg fyrir viðburðinn, það kom nánast til handalögmála þegar Stalker var sýnd og hópur Íslendinga barðist fyrir því að Tarkovskí-hjónin endurheimtu son sinn frá Sovétríkjunum.
Líf og list Andrejs Tarkovskís verður rifjuð upp að gefnu tilefni, sett í samhengi við rússneska og alþjóðlega kvikmyndagerðalist og krufin út frá bókmenntum, heimspeki, tónlist og tölvuleikjum.
Leiðin liggur að mærum austurs og vesturs, hryllings og fegurðar, staðar og staðleysu, áfalla og uppljómunar — inn í ráðgátuna, söguna, sköpunina og myrkviði mannsálarinnar.
Námskeiðið er opið öllum og krefst engrar fyrirframþekkingar.
Skipulag
Fyrirlesari
Gunnar Þorri Pétursson nam í Skt. Pétursborg og Moskvu og hefur tvívegis hlotið Íslensku þýðingaverðlaunin fyrir þýðingar sínar á rússneskum bókmenntum. Hann hefur um árabil haldið úti vinsælum námskeiðum um rússneskan skáldskap á Hótel Holti en fjallar nú í fyrsta sinn á opinberum vettvangi um töfra kvikmyndalistarinnar í verkum Tarkovskís.
Andrej Tarkovskí & Gunnar Þorri
Styrkur
Átt þú rétt á styrk frá þínu stéttarfélagi eða Vinnumálastofnun til að sækja námskeið eða nám? Sjá frekari upplýsingar : Fræðslustyrkur
Stakkahlíð 1, 105 Reykjavík
Íslenska / Icelandic
16. apr 2025