Sumarnámskeið í Hljómfræði

Kennsla fer fram í formi fyrirlestra og er yfirferðin mjög hröð. Til að námskeiðið geti nýst nemendum sem best er því mikilvægt að nemendur vinni verkefnin jafnt og þétt.

Gísli Magnússon nam tónsmíðar, fyrst við Listaháskóla Íslands en síðar við Konservatoríið í Amsterdam, þaðan sem hann lauk meistaraprófi vorið 2017. Á meðal helstu kennara hans má nefna Gunnar Andreas Kristinsson, Hróðmar Inga Sigurbjörnsson, Atla Ingólfsson, Joël Bons og Wim Henderickx, en hann hefur einnig sótt námskeið og einkatíma hjá tónskáldum á borð við Kaiju Saariaho, Francisco Filidei og Fabien Lévy.

Í tónsmíðum sínum hefur Gísli lagt megináherslu á að semja fyrir hefðbundin hljóðfæri, allt frá einleiksverkum upp í stór hljómsveitarverk, og hefur hann átt farsælt samstarf með hinum ýmsu hljóðfæraleikurum og -hópum hér á landi, sem og erlendis. Má þar nefna Duo Harpverk, Caput, Jöklu, Elju, Uusinta Ensemble, 4×5 Duo, .abeceda [New Music Ensemble] sem og Sinfóníuhljómsveit Íslands.

Tónsmíðar Gísla eru gjarnan áferðarríkar og myndrænar og tengjast viðfangsefnin oftar en ekki náttúru, draumum, dulúð og/eða súrrealisma. Í sumum eldri verka hans má heyra ítarlegar lýsingar á fossum, goshverum og öðrum náttúrufyrirbrigðum og eru þau verk hugsuð sem eins konar hljóðskúlptúrar. Í nýrri verkum hans eru viðfangsefnin þó yfirleitt ögn óræðari og gjarnan nokkuð dulræn.

Vorið 2017 var Gísli valinn til þátttöku í Yrkju, tónskáldastofu Sinfóníuhljómsveitar Íslands og Tónverkamiðstöðvar, og lauk því samstarfi með frumflutningi á verkinu Akvocirkulado á Myrkum músíkdögum 2018. Síðan þá hafa verk Gísla hljómað á ýmsum hátíðum hér á landi og erlendis, t.d. Norrænum músíkdögum, ISCM World New Music Days, Musiikin Aika og Bled Contemporary Week.