Masterclass í kórstjórn

Í þessum masterclass öðlast nemendur nauðsynlega undirstöðu í kórstjórn.

Í því felst að undirbúa kórverk, með eða án undirleiks, og stjórna flutningi þeirra.

Nemendur öðlast tæknilega færni og þekkingu til að túlka og móta tónlistina á skýran hátt með tilliti til stíls, textainnihalds og stemmingar, ásamt þekkingu á uppbyggingu kórastarfs, skipulagi kóræfinga, raddmótun og viðeigandi verkefnavali.

Farið er í mótun og túlkun kórverka frá mismunandi tímabilum.

Áhersla er á yfirferð á kórefni í mismunandi stíltegundum, sem nemendur öðlast æfingu í að stjórna.

Farið er í uppbyggingu kóræfinga og raddmótun.

Skipulag:
Námskeiðið er kennt á mánudögum kl 16:00 – 18:30 í Langholtskirkju.
3. nóvember – 8. desember.
Námskeiðinu lýkur með tónleikum þann 12. desember.

Forkröfur:
Almenn tónlistarkunnátta og nótnalestur

Hæfniviðmið:
Í lok námskeiðisins á nemandi að:

• Geta slegið allar nauðsynlegar takttegundir með skýru taktföstu slagi
• Hafa vald á fjölbreyttum túlkunarmöguleikum taktslags og á sjálfstæðri notkun handanna við túlkun kórverka
• Hafa þekkingu á raddþjálfun í kórastarfi
• Geta stjórnað gregorskum messusöngvum, fjögurra til sex radda mótettum og fjögurra radda pólýfónískum messuþáttum
• Hafa þekkingu og færni í góðri skipulagningu og stjórn kóræfinga

Kennari:

Magnús Ragnarsson er listrænn stjórnandi tónlistarstarfs Langholtskirkju.
Magnús stundaði nám við Tónlistarskólann í Reykjavík, Tónskóla Þjóðkirkjunnar og Tónlistarháskólann í Gautaborg.
Þá stundaði hann framhaldsnám í kórstjórn hjá Stefan Parkman við Háskólann í Uppsölum.Magnús starfar sem organisti í Langholtskirkju og stjórnar Kór Langholtskirkju, sem er 32 manna kór með menntuðum tónlistarmönnum.
Hann hefur stjórnað Söngsveitinni Fílharmóníu frá janúar 2006, Hljómeyki árin 2006–2012 og Melodiu-Kammerkór Áskirkju 2007-2017.
Hann kennir kórstjórn við Tónskóla Þjóðkirkjunnar og Listaháskóla Íslands og starfar sem kórstjóri við Íslensku Óperuna.
Hann hefur stjórnað ballettum og kammeróperum, stjórnað Lutoslawski-Fílharmóníuhljómsveitinni í Póllandi og átt farsælt samstarf við Sinfóníuhljómsveit Íslands.
Magnús hefur unnið til verðlauna með kórunum sínum í Florilège Vocal de Tours,  Llangollen í Wales, Arezzo á Ítalíu og Béla Bartok-kórakeppninni í Ungverjalandi þar sem hann fékk sérstök verðlaun fyrir besta flutning á nútímaverki.
Hann var tilnefndur til Íslensku tónlistarverðlaunanna 2015 fyrir flutning á Þýsku sálumessunni eftir Brahms og 2016 var hljómdiskur Melodiu undir hans stjórn tilnefndur sem plata ársins.

•