Að skrifa fyrir raddir – Námskeið & vinnustofa

Að skrifa fyrir raddir – námskeið og vinnustofa

Á þessu einstaka námskeiði koma þáttakendur til með að læra undirstöðuatriði þess að skrifa fyrir söngraddir.

Litið verður gaumgæfilega á nokkur merkileg sönglög, verk fyrir kóra og önnur verk fyrir raddir, þau greind og nemendur fá m.a. innsýn í það hvernig verkin eru uppbyggð og hvernig þau virka.

Námskeiðið er að hluta til vinnustofa og nemendur eru hvattir til þess að skrifa stutt verk fyrir rödd eða raddir undir handleiðslu kennara á tímabilinu.
Hægt er að mæta með verk í vinnslu, eða þá byrja á nýju splunkunýju verki.
Við skoðum dæmi um það hvernig sköpunarferli virka.

Forkröfur

Nemendur verða að hafa góðan skilning á tónfræði. Undirstaða í hljómfræði er kostur en ekki skylda. Nemendur þurfa ekki að hafa skrifa tónverk fyrir raddir áður.

Skipulag:

Þriðjudags og fimmtudagskvöld:
7., 9., 14. 16. 21. og 23. október 2025.
Hver tími eru 2 klst. – 17:00-19:00

Kennari:

Dr. Helgi Rafn Ingvarsson tónskáld.

Helgi er sjálfstætt starfandi tónskáld með aðsetur á Íslandi og Englandi. Tónverk hans eru reglulega flutt á Norðurlöndunum og Bretlandseyjum og meðal verkanna eru m.a. fjöldinn allur af kórverkum, sönglögum, hljóðfæraverkum fyrir kammerhópa, sjö óperur og ýmis önnur tilraunakennd verk.
Helgi er með doktorsgráðu í tónsmíðum frá Guildhall School of Music and Drama í London (2018) þar sem hann var studdur af Guildhall School Trust og hlaut m.a. heiðurstitilinn „Composition fellow“. Hann lagði einnig stund á tónsmíðar við Listaháskóla Íslands og Tónlistarháskólann í Malmö (Musikhögskolan i Malmö) sem er partur af Háskólanum í Lundi (Lunds Universitet).

Nánar á heimasíðu hans: https://helgiingvarsson.com/

•